Marihuana, hass og hassolía eru unnin úr plöntunni Cannabis Sativa (indverskur hampur) sem er, fjölær planta sem þrífst vel í heittempruðu, þurru loftslagi. Plantan sem er villt jurt, getur náð allt að fimm metra hæð á einu ári. Hún er skærgræn að lit, hefur einn aðalstöngul og fingurlöguð laufblöð. Laufin eru lítil með sagtenntum brúnum. Hver grein ber fimm til níu laufblöð. Jurtin er fremur auðveld í ræktun á opnu svæði og þrífst vel við loftslagsskilyrði Evrópu. Í góðu árferði vex plantan  utandyra á Íslandi yfir bestu sumarmámuðina. Plöntuna er hægt að rækta hvar sem er innanhúss í glugga eða undir blómaljósi.

 Trefjar plöntunnar hafa verið notaðar til að búa til reipi (hampreipi) og fræin eru notuð í dýrafóður.

Plantan inniheldur mörg hundruð ólík efnasambönd og eitt þeirra er vímugefandi. Þetta efnasamband er Tetrahydrocannabinol (THC). THC fyrirfinnst bæði í kven- og karlplöntum. Megnið af því safnast fyrir í blómstrandi plöntutoppunum og blöðunum. THC er einnig til staðar í stöngli og greinum en þessir hlutar eru sjaldan notaðir til framleiðslu fíkniefnisins. Rætur og fræ plöntunnar innihalda ekki THC. Jurtin framleiðir THC strax og hún spírar. Stærð og lögun plöntunnar hafa því engin áhrif á magn THC í henni.

Kannabis er á skrá sem alþjóðlegt fikniefni. Á Íslandi eru allir hlutar plöntunnar bannaðir svo og meðhöndlun hennar.

Marihuana

Marihuana er fyrsta stig á framleiðslu fíkniefnis úr kannabisplöntunni. Það er framleitt með því að skera niður plöntuna, þurrka hana og mala. Stönglarnir eru yfirleitt ekki notaðir og grófleiki mölunar getur verið mismunandi. Marihuana getur þess vegna innihaldið stóran hluta laufblaðanna, stilka og fræ. Styrkleiki marihuana og hvort það inniheldur fræ veltur oft á því hvar ræktun plöntunnar fór fram. Eins og fram hefur komið er plantan fjölær og undir lok blómgunartímans mun hún hafa borið blóm og fræ. Í framleiðslu í heitu loftslagi er plöntunni gefinn tími til að bera fræ þar eð sú aðferð leiðir til aukinnar framleiðslu vímugefandi efnis í efstu hlutum hennar. Marihuana sem ræktað er erlendis inniheldur því oft fræ og litið er á fræin sem gæðamerki. Uppskera marihuana sem ræktað er í Skandinavíu fer yfirleitt fram fyrir blómgun því vaxtartími gróðurs er svo stuttur að plantan nær sjaldnast að bera fræ. Sé plantan ræktuð innanhúss er auðveldlega hægt að fá af henni fræ. Erlent marihuana er að öllu jöfnu í hærri gæðaflokki og jafnframt brúnleitara en gerist hér á landi. Lyktin er einnig öðruvísi. Íslenskt marihuana er yfirleitt grænna að lit og lyktar eins og þurrkað gras. Innflutt marihuana hefur mun ákveðnari kryddlykt.

Magn THC í marihuana er gríðarlega mismunandi. Venjulega er innihald TCH milli 0 - 2,5% en getur farið upp í allt að 20% í kynbættum plöntum (super skunk). Allt að 7% THC-innihald hefur greinst í innfluttu marihuana. Þessum árangri er náð með því að aðskilja blómstilkana sem kallaðir eru "tælenskar vefjur" (Thai sticks). Efstu greinarnar eru skornar frá og laufblöðin og lifandi blómstilkarnir eru spelkaðir um efstu greinarnar áður en þær eru þurrkaðar.

Hass

Hass fæst með frekari vinnslu fínmalaðs marihuana. Efnið er ólíkt og breytilegt jafnvel frá sama framleiðanda. Litur þess er mismunandi; svartur, dökkbrúnn, brúnn, ljós brúnn, rauðbrúnn, grábrúnn, grágrænn út í grænt. Viðkomu er hass ýmist þurrt og kornótt, mjúkt og plastkennt eða hart. Sökum þess að mismunandi tækni er notuð við vinnslu hassins getur verið mjög mikill munur á gæðum þess og útliti. Innihald THC í hassi er mismunandi og sem vísbendingu um styrkleika getur hann legið á bilinu 2 til 8%. Meirihluti hassframleiðslu fellur undir lægri prósentutölurnar.

Ef efsti hluti plöntunnar er eingöngu notaður til vinnslu hass verður innihald THC mun meira. Áður fyrr var mögulegt áætla magn THC og vímugefandi áhrif hassins af útliti þess og lit. Þetta er ekki hægt lengur þar sem nú á dögum er hass oft blandað ýmsum efnum til uppfyllingar og drýgingar og því um leið gefið útlit hass í háum gæðaflokki Þessi meðhöndlun efnisins fer ekki fram í framleiðslulandinu sjálfu. Vitað er um ákveðnar vinnsluaðferðir á Spáni og í Hollandi sem felast í því að hassið er unnið upp á nýtt og ýmsum efnum bætt út í til að auka þyngd og ummál. Mangóolíu er bætt út í til að mýkja hassið en til að herða það má nota venjulegt ryk og ýmis önnur efni, s.s. tað, gras ofl.

Hassolía

Hassolía er beiskur, seigfljótandi, vökvi ekki ólíkur sírópi. Unnin hassolía er sterkasta afbrigði kannabisplöntunnar sem við þekkjum í dag hér á landi. Olíublandan er svar/græn-brún og ber fremur óþægilegan beiskan keim. Ástæðan fyrir framleiðslu hassolíu er til að auðvelda smygl. Venjulegt form marihuana og hass innihalda tiltölulega lítið af virkum efnum. Þar af leiðandi er nauðsynlegt að smygla miklu magni eigi gróðinn að verða umtalsverður. Með samþjöppun virkra efna er unnt að minnka verulega ummál þeirra fíkniefna sem smyglað er. Magn THC í hassolíu er jafnvel enn misjafnara en í marihuana og hassi. THC innihald hassolíu getur verið frá 10 til 60 %.

THC olía

Þetta er ný framleiðsla sem enn hefur ekki rutt sér til rúms á Norðurlöndum. THC-olía er unnin úr hassolíu sem hefur verið hreinsuð sérstaklega til að ná fram allt að 100% THC innihaldi.

THC-olía er glær þunnur vökvi. Lykt er ókunn.