"Tollverðir fundu á föstudag um eða yfir 13.000 steratöflur í vörusendingu sem hafði verið skipað í land í Reykjavík. Viðtakandi sendingarinnar var verslunarmaður á Suðurnesjum og voru efnin flutt inn í nafni hans.

Magnið er mikið en það er þó ekki einsdæmi að lagt sé hald á svo mikið magn af sterum og sem dæmi má nefna að í mars í fyrra lagði tollstjórinn hald á mikið magn af sterum á líkamsræktarstöð í borginni. Í janúar sl. komu tollverðir á Seyðisfirði upp um tilraun til að smygla um 200 hylkjum af vaxtarhormón og um 40 hylkjum af sterum til landsins en efnin voru falin í bifreið.

Þeim sem nota ólöglega stera eða hugsa sér að gera það má m.a. benda á að nýlega sýndu vísindamenn við Yale-háskóla fram á að þeir sem nota stera til að byggja upp vöðvamassa eiga á hættu að heilafrumur eyðist í stórum stíl."

Í niðurstöðum rannsóknarinnar segir meðal annars að sú staðreynd sé þekkt að mikil notkun á sterum veldur miklum skapgerðarbrestum, árásargirni og sjálfsvígstilhneigingum.

Einnig segir í niðurstöðunum að testesteron er aðal karlhormón líkamans og skipar mikilvægt hlutverk í myndun, greiningu og stækkun heilafrumna. Testesteron getur haft þau áhrif á taugafrumur að jafnvægi þeirra raskast sem síðan leiðir til skapgerðarbreytinga og minnisleysis.

Fyrir neðan er hlekkur á heimasíðu Yale þar sem lesa má greinina í heild sinni.

Þess má einnig geta að notkun á sterum hefur áhrif miklu fleiri þætti líkamsstarfsseminnar eins og lifrina, hjartað, nýrun, sæðisframleiðslu og fleira. Það er ekki óalgengt að komið sé með ungt fólk, yfirleitt karlmenn, á bráðamóttökur sjúkrahúsanna vegna alvarlegra hjartatruflanna sem orsakast af steranotkun.